Joesmvg

Kuva kuri Adamu gushika kuri Nowa
1 Ng'uru rutonde rw'uruvyaro rwa Adamu: umusi Imana irema Adamu, yamuremanye agashusho k'Imana. 2 Yabaremye ari umugabo n'umugore, irabahezagira, ibaha izina Umuntu umusi ibarema. 3 Adamu amaze imyaka ijana na mirongo itatu, avyara umuhungu asa na we afise agashusho kiwe, amwita Seti. 4 Adamu amaze kuvyara Seti, amara imyaka amajana umunani, avyara abahungu n'abakobwa. 5 Imyaka Adamu yamaze yose hamwe ni amajana icenda na mirongo itatu, hanyuma arapfa. 6 Seti amaze imyaka ijana n'itanu, avyara Enoshi. 7 Amaze kuvyara Enoshi, Seti amara imyaka amajana umunani n'indwi, avyara abahungu n'abakobwa. 8 Imyaka Seti yamaze yose hamwe ni amajana icenda na cumi n'ibiri, hanyuma arapfa. 9 Enoshi amaze imyaka mirongo icenda, avyara Kenani. 10 Amaze kuvyara Kenani, Enoshi amara imyaka amajana umunani na cumi n'itanu, avyara abahungu n'abakobwa. 11 Imyaka Enoshi yamaze yose hamwe ni amajana icenda n'itanu, hanyuma arapfa. 12 Kenani amaze imyaka mirongo indwi, avyara Maharareri. 13 Amaze kuvyara Maharareri, Kenani amara imyaka amajana umunani na mirongo ine, avyara abahungu n'abakobwa. 14 Imyaka Kenani yamaze yose hamwe ni amajana icenda na cumi, hanyuma arapfa. 15 Maharareri amaze imyaka mirongo itandatu n'itanu, avyara Yeredi. 16 Amaze kuvyara Yeredi, Maharareri amara imyaka amajana umunani na mirongo itatu, avyara abahungu n'abakobwa. 17 Imyaka Maharareri yamaze yose hamwe ni amajana umunani na mirongo icenda n'itanu, hanyuma arapfa. 18 Yeredi amaze imyaka ijana na mirongo itandatu n'ibiri, avyara Hanoki. 19 Amaze kuvyara Hanoki, Yeredi amara imyaka amajana umunani, avyara abahungu n'abakobwa. 20 Imyaka Yeredi yamaze yose hamwe ni amajana icenda na mirongo itandatu n'ibiri, hanyuma arapfa. 21 Hanoki amaze imyaka mirongo itandatu n'itanu, avyara Metusherahi. 22 Amaze kuvyara Metusherahi, Hanoki amara imyaka amajana atatu ayobokera Imana; avyara abahungu n'abakobwa. 23 Imyaka Hanoki yamaze yose hamwe ni amajana atatu na mirongo itandatu n'itanu. 24 Hanoki arayoboka Imana, aca arazimangana kuko Imana yari yamujanye. 25 Metusherahi amaze imyaka ijana na mirongo umunani n'indwi, avyara Rameki. 26 Amaze kuvyara Rameki, Metusherahi amara imyaka amajana indwi na mirongo umunani n'ibiri, avyara abahungu n'abakobwa. 27 Imyaka Metusherahi yamaze yose hamwe ni amajana icenda na mirongo itandatu n'icenda, hanyuma arapfa. 28 Rameki amaze imyaka ijana na mirongo umunani n'ibiri, avyara umuhungu. 29 Amwita izina Nowa, yibwira ati: «Uwo azoturwanako mu magorwa n'imiruho amaboko yacu aterwa n'iyi si yavumwe n'Umukama.» 30 Mu nyuma z'aho avyariye Nowa, Rameki amara imyaka amajana atanu na mirongo icenda n'itanu, avyara abahungu n'abakobwa. 31 Imyaka Rameki yamaze yose hamwe ni amajana indwi na mirongo indwi n'indwi, hanyuma arapfa. 32 Nowa amara imyaka amajana atanu, hanyuma Nowa avyara Semu, Hamu na Yafeti.